Монгол Улсын Хүүхэлдэйн театр нь 1948 онд анх үүсэн байгуулагдсан бөгөөд 75 жилийн хугацаанд хүүхэд, багачуудад зориулан хүүхэлдэйн олон төрөл хэлбэрээр уран бүтээлээ туурвиж соёл, урлагийн боловсролыг олон нийтэд түгээн дэлгэрүүлэн ажиллаж буй хүүхэлдэйн урлагийн цорын ганц мэргэжлийн театр юм.

Тус театр нь байгуулагдсаныхаа эхний он жилүүдэд “хуруун” ба “таягт” хүүхэлдэйгээр голлон тоглож байсан бол өнөө үед хүүхэлдэйн олон төрөл хэлбэрийг хөгжүүлж “сүүдрийн”, “кварцын”, “багт” болон “утсан хүүхэлдэй”-н техникийг эзэмшиж, дэлхийн хүүхэлдэйн урлагийн хөгжлийн хурдацтай хөл нийлүүлэн хөгжихийг эрмэлзэж байна.

Монгол Улсын Хүүхэлдэйн театрын жүжигчид уран бүтээлээрээ олон улсын хүүхэлдэйчдийн их наадмуудад амжилттай оролцож айлчлан тоглолтуудыг хийн, харилцаа холбоо тогтоон өргөжүүлж Монгол үндэсний соёл, зан заншил, өв уламжлал соёлоо сурталчилан, хөгжүүлсээр байгаа юм.

Тус театр нь одоогийн байдлаар нийт 31 хүний бүрэлдэхүүнтэйгээр үйл ажиллагаагаа явуулж байгаа бөгөөд үүнээс 17 нь уран бүтээлчид юм. Үүнд: мэргэжлийн хүүхэлдэйн жүжигчин - 11, найруулагч - 1, гэрлийн инженер - 1, дууны инженер - 1, тайзны ажилтан - 1, хүүхэлдэй урлаач - 2, 1 зураачаас бүрдэн хүүхдийн тайзны уран бүтээлийг туурвин ажиллаж байна. Жүжигчдийн хувьд 2 - 32 жил ажиллаж байгаа бөгөөд СУИС, КУДС, Мюзик холл болон ОХУ-ын Санктпетербург хотын Урлагийн Академийг төгссөн.

2023 оны байдлаар нийт 140 гаруй уран бүтээл бүхий урын сантай театр болон хөгжсөн.

Тус театр нь захиргаа, маркетинг, уран бүтээл, үйлдвэр, тайзны албуудаас бүрэлдэх ба нийт 160 хүний суудал бүхий үзвэрийн танхимтай, үзэгчдийн танхимд пробил, гэрэлтүүлгийн тоног төхөөрөмж, “5.1 surround sound system”-ийг тус тус нэвтрүүлэн ажиллаж байна.

ЭРХЭМ ЗОРИЛГО:

Хүүхэлдэйн урлагийн олон хэлбэрийг хөгжүүлж бүтээгдэхүүн үйлчилгээний чанарыг сайжруулж хүртээмжийг нэмэгдүүлнэ.

АЛСЫН ХАРАА:

Хүүхэлдэйн урлал,үйлдвэрлэл, үзэсгэлэн, музей, худалдаа, үйлчилгээ, медиа контент хөгжүүлэлтийн цогц шийдэл бүхий театр болно. 

СТРАТЕГИЙН ЗОРИЛГО 1. БАЙГУУЛЛАГЫН МЕНЕЖМЕНТИЙН ЧАДАВХИЙГ БЭХЖҮҮЛНЭ.
Зорилт 1.1 Уран бүтээлч, ажиллагсдын бүтээлч санаачлага, үйл ажиллагааг дэмжсэн инновацийн үр ашигтай орчин бий болгож
гүйцэтгэлийн удирдлагыг бэхжүүлнэ.
Зорилт 1.2 Мэргэжлийн өндөр ур чадвар бүхий хүний нөөц бүрдүүлэх, сургах, хөгжүүлэх, нийгмийн баталгааг хангах чиглэлд оновчтой
бодлого боловсруулан хэрэгжүүлнэ.
Зорилт 1.3 Байгууллагын үйл ажиллагааг төсөв санхүүгийн оновчтой удирдлагаар хангах ажлыг эрчимжүүлж санхүүгийн бие даасан
байдлыг бэхжүүлнэ.
Зорилт 1.4 Олон улс, бүс нутгийн хэмжээнд хамтын ажиллагаа, нийгмийн түншлэлийг хөгжүүлж нийгэмд эзлэх байр сууриа бэхжүүлнэ.

СТРАТЕГИЙН ЗОРИЛГО 2. УРАН БҮТЭЭЛИЙН ЧАНАРЫГ САЙЖРУУЛЖ ҮЙЛЧИЛГЭЭНИЙ ХҮРТЭЭМЖИЙГ НЭМЭГДҮҮЛНЭ.
Зорилт 2.1 Урын сангийн түүхэн ач холбогдолыг нэмэгдүүлж шинэ бүтээлээр баяжуулна.
Зорилт 2.2 Уран бүтээлийг дэвшилтэт технологийн тусламжтайгаар эдийн засгийн эргэлтэд оруулах ажлыг эрчимжүүлнэ.
Зорилт 2.3 Маркетингийн үйл ажиллагааг бүтээгдэхүүн үйлчилгээний бодлоготой нягт уялдуулж мэргэжлийн түвшинд зохион байгуулна
Зорилт 2.4 Урын сан дахь бүтээлийн хадгалалт хамгаалалтыг сайжруулах, зохиогчийн эрхийг баталгаажуулах ажлыг эрчимжүүлж
цахим болгоно

СТРАТЕГИЙН ЗОРИЛГО 3. ҮЗВЭРИЙН ОРЧИН НӨХЦӨЛИЙГ САЙЖРУУЛНА.
Зорилт 3.1 Театрын шинэ барилгын ажлыг эрчимжүүлнэ.
Зорилт 3.2 Үзвэрийн танхимын техник, тоног төхөөрөмжийг шинэчлэх сайжруулах, ажилтныг сургах, хөдөлмөрийн аюулгүй ажиллагааг
шинэ шатанд гаргах ажлыг эрчимжүүлнэ
Зорилт 3.3 Үзвэр, үйлчилгээний дотоод, гадаад орчинг шинэчлэн сайжруулна.
Зорилт 3.4 Үйлчилгээний стандартыг мөрдлөг болгоно.